fbpx
إزاي تعمل نرد إلكتروني؟ #٢
يناير 25, 2018
Vested Summit .. من سيليكون فاللي – للجونة
مايو 9, 2018

أمل صلاح و الفن برا الصندوق.. She nailed it!

مسمار ورا مسمار، وشاكوش عمال يدق على لوح خشب. لوحة بتتشكل وماحدش غيرها شايف الصورة لسه..

يا ترى إيه إللي مخليها بتعمل ده؟ واقفة بالساعات، والأيام، بتدق مسامير على خشب؟

أمل صلاح هي مهندسة معمارية، زوجة، أم، و مؤسسة Shuffle Designs.. وهي واحدة من الناس إللي بتقدر توصفها بإنها “a walking piece of Art”.

أمل بتخلق فن من أغرب الأدوات، بترسم لوحة من الخشب مثلا بالمسامير، أو الدبابيس و ممكن من سلك السماعات.. مرة عملت وحدة إضاءة كاملة من شرايط الcassette الفاضية!

كان عندي فضول كبير منين ببيجيلها الإلهام، فسألتها:

“الإلهام مالهوش قوانين.. لما بيجي فهو بييجي. بس مثلا بحب جدا أشتغل مع الأطفال! كنت في مرة بدي workshop للأطفال إزاي يدقوا دبابيس على الخشب. فجه الولد ده وقعد يفصص الدبابيس وحطعهم جنب بعض كدا رسم وردة، وبعدها مسك قلم جاف و قعد يلونهم. “بصي يا ميس عملت وردة!”

بحب أشتغل مع الأطفال عشان هم ماعندهم كل القيود إلي عندنا، كل حاجة ممكنة و ليه لأ؟ والفضول عندهم مالوش نهاية

 

أول design جالي إلهام ليه كان من جوزي: صورة ليه مع ابني الكبير وكان من المسامير والخشب.”

بعد ٦ سنين، دلوقتي Shuffle Designs عملت عشرات الdesigns، وأهدت تصميمات لعدد من الفنانين زي عمرو سلامة، إبراهيم معلوف وأحمد الفيشاوي.

بس الرحلة دي ما كنتش سهلة..

” أول حتة خشبة جبتها كانت من الشارع، حرفيا. ماكنش معايا لا فلوس ولا خبرة، وماكنش عندي علم بأنواع الخشب أو حتى أجيبه منين.. كان دايما بيتضحك عليا، يدوني أي حتة خشب (وغالبا مش بتنفع) وبضعف السعر، بالنسبة لهم بنت صغيرة مش فاهمة حاجة”

لوح ورا لوح، أمل بدأت تعمل designs أكتر. بدأت تختار مشاهد من أفلامها المفضلة وتصممها على لوحة خشب بالمسامير، وبدأت تعمل سلسلة من الألواح للSuperheroes (أول واحد كان Batman!) عشان تزين أوضة ابنها. شوية وبدأ صحابها يشجعوها أكتر، ويطلبوا منها portraits ليهم.

بعد فترة تجربة قعدت سنة، أمل قررت توسع شغلها أكتر وتاخد feedback من برا.. فأنشئت Shuffle Designs: عملت facebook page، وبدأت تنزل بشغلها في معارض

 

” بقالي 6 سنين دلوقتي، أكتر سؤال بيتسئل لي هو ليه؟ ليه أنا كواحدة ست أختار إني أقعد أدبس 4000 دبوس في لوحة خشب، ببهدلة الخشب، وبعد كدا أفضل ألون فيهم واحدة واحدة؟ ليه أروح site لسه بيتجهز في أكتوبر (وأنا ساكنة في الرحاب)، في وسط 20 عامل لوحدي وأنا معايا ابني 10 شهور لسه بيرضع.. وأفضل واقفة 8 ساعات، كل يوم؟

الحقيقة أنا بحب التفاصيل جدا.. إزاي ممكن أخلق حاجة كبيرة من حاجة صغيرة جدا زي مسمار، أو دبوس. ببقى بشتغل مثلا على لوحة horizontal ومحدش فاهمها غيري، وملامحها مش بتبان غير لما أعلقها. بحب جدا رأي الclient لما يشوف النتيجة

فالناس بتستغرب أنا ليه مختارة شغلانة فيها مجهود جسدي كبير، يعني هي جايبة همها؟ ماديا، يمكن لسه.. بس أنا باخد الفرص، يمكن تفتحلي فرصة أقرب للبيت وأحسن.”

طيب إنتِ شايفة شغلك  مكانه فين في الMakers Movement؟

” كنت دايما عندي انطباع إن الcommunity دي مختصرة على الgeeks والtechnology والحاجات دي.. يمكن الانطباع ده جالي لما حضرت أول ميكرفير (Mini-Maker Faire Cairo)، حتى لسه معايا المفكات والnotebook إللي كانوا بيوزعوها هناك.. بس بالنسبة لShuffle Designs، فمابشوفش حد بيعمل شبه شغلي لسه”

هو إنتِ مش خايفة حد ياخد أفكارك ويبتدي يشتغل بالمسامير مثلا بردو؟

” أنا في حاجة جوايا بتحركني أنا نفسي مش فاهماها.. فجأة بلاقي نفسي هاعمل 1 و 2 و 3، وفجأة باقعد. وبعدين أفضل أصمم في الDesigns وأقوم أدبس آلاف الدبابيس عشان أبين كل التفاصيل: الوش بالtattoo بالألوان.. فأيوا أي حد ممكن يعمل وردة بخمس دبابيس، بس الفكرة كلها في التفاصيل

وبالنسبة لي، الفكرة في الطاقة والشغف إللي جوايا إللي بيطلع كل مرة بشكل مختلف”

طيب وإيه الخطوة الجاية إلي عايزة تاخديها؟

“عايزة أجرب أشتغل بmaterials أكتر، أجرب حاجات كتير.. و عايزة أعمل Robot للأولمبياد، آخد feedback على مستوى عالمي.”

لو حد حابب بيتدي زيك، ممكن تقولي له إيه؟

” قبل ما تبتدي إنت عايز تعمل إيه؟ عايز تفتح شركتك؟ عايز تطلع طاقتك في إنك تخلق حاجة؟ تعلم أطفال؟ عايز تعود نفسك إنك تشوف الحاجات بشكل مختلف؟ إنت عايز تعمل إيه؟”

X