حكايتي حكاية إنسان عادي زي كل الناس، إنسان حلم و فكر، الفرق إني قررت أتحدى الواقع و أكون مختلف. قررت أحلم أكتر و أفكر بصوت عالي و أشتغل بكل قوتي و أتحرك لقدام حتى لو كانت حركتي بطيئة.
آمنت بحلمي و بقى هدفي، و الفكرة بدأت خطوة و الخطوة بدأت تكبر و وحدة وحدة اتولد Master Crafter.. يمكن في نظركوا لسة صغير بس في نظري بيكبر كل يوم شوية، أنتوا شايفينه بيكبر ببطئ و أنا شايفه بيكبر كل يوم عن الي قبله أكتر.
اسمي باسم، كنت طالب في هندسة عمارة و أغلب شغلي بالورق و الماكتات، و عندي أخ تؤم اسمه لؤي. في يوم كنا بنشوف فيديو على اليوتيوب “إزاي تعمل أيرون مان Iron Man”.
قررنا نعملها و جت فكرة تانية ان ليه منجمعش الناس الي شبهنا، الناس الي بتحب الكرافت. و أن كل ما الناس كترت كل ما كان الأنتاج أسرع و عملنا شغل أكتر.
كنت بدي classes في مكان اسمه كلاود “cloud” و هو المكان الي بدأ يساعدني في أني أبدأ و أني أعدي أول خطوة. واجهتنا صعوبات منها أننا رحنا لصحابنا و مقبلوش الفكرة. فقررنا نروح الجامعة بتاعتنا MIU و نعمل نشاط طلابي، لكن بعد سنة أتقفل.. الطلاب أستقبلوا الفكرة و حبوها و لكن الجامعة نفسها رفضت الفكرة.
أيرون مان Iron man كان أول مشروع و برغم أن العدد كان قليل، إلا أننا عرفنا نخلصه و أخدنا فيه سنة بسبب قلة العدد. هو المشروع الي دخلنا بيه أول ميكر فير كايرو (Maker Faire Cairo) كبير في مصر في 2016. لكن الميني ميكرفير كايرو 2015 دخلنا بشوية Helmets زي باتمان و ايرون مان و كابتن أمريكا و غيرهم. و دخلنا ميكرفير كايرو ٢٠١٧ و عملنا ألعاب للأطفال و بيبي فوت من الورق و الكيوبي تونز.
في الأول كنا بنلم الفلوس من بعض، مش كل الناس كانت بتشتغل في نفس الوقت وطبعا كان بياخد وقت كبير، و ده كان من المصاعب الي وجهتنا، بس بعد كده بدأنا ندخل في مشاريع تانية و الي منها بدأنا نجيب فلوس.
من المشاريع دي ديكور لبرنامج و إعلان Stock Motion لشركة منارة و شخصيات على شكل cubes اسمهم cubitoons.
و دخلنا مسابقات زي مسابقة الأتحاد الدولي للمعمارين و كسبنا في فرنسا مركز مشرف على المشروع الي عملناه و كان كتاب عن العمارة النوبية و أسمه Craftino، و هو كتاب Pop up. رحنا المؤتمر في كوريا الجنوبية. الي ساعدنا في عمل الكتاب ده في الأول شركة هندسية لكن سابتنا لما خرجنا بره و حاولنا نروح لحد عشان ينشر الكتاب و لكن محدش وافق و كان الكل خايف ياخد الخطوة دي بسبب إن الموضوع مش مشهور في مصر و إن الكتاب مش كتاب عادي مطبوع أو مكتوب بس. و لحد دلوقتي بندور على حد يوافق ينشره و يبيعه. و عملنا Summer camps و ورش لتعليم الأطفال زي Stread workshop و هو تعليم الأصفال أزاي انهم يعملوا مكتبات صغيرة.
مش كل الي بنعمله بيتباع، في حاجات بتتباع و حاجات لأ، الألهام بيجلنا من الفرص، الفرصة تيجي و يجي معاها الفكرة و الألهام.
عندنا هدف و هو أننا نكبر و نتوسع، و إن الناس تكون Master Crafters. هي الفكرة إن ماستر كرافتر هو platform بيجمع الناس الي بتحب الcrafts و يبقى في levels كل ما تدخل مشاريع أكتر تعدي levels لحد ما توصل لإنك تكون ماستر كرافتر. و نفسنا نعمل App على الموبايل لكن للأسف ده صعب حاليا بسبب الوقت و الفلوس.
لحد دلوقتي احنا الي بنلاقي الناس و نفسنا الناس تعرفنا و تشتغل معانا، الموضوع اننا في مصر مقفلين يعني مش كل الناس تعرف بعضها و لا عايزين يتطوروا يعني كل واحد مقفل على نفسه و ده بخلي base التطوير في مصر بطئ.
حبنا في الي بنعمله بيخلينا نكمل و بيخلينا ميجيلناش احباط. نفسنا نعمل مشاريع أكتر و نعمل من الكتاب Craftino سلسلة كتب. لو كل واحد فينا بقى ماستر كرافتر مش هنضطر نشتري كل حاجة و ده هايساعد في اقتصادنا و هايساعدنا شوية في الظروف الي أحنا فيها و بالذات إن الدنيا بقت غالية.
بندور على ناس عايزة تكون معانا و تساعدنا و تحب الي بنعمله، عندنا أماكن فاضية في الشغل زي Graphic designers، رسامين، PR، Social media و مهندسين.
نفسنا يكون ماستر كرافتر بيزنس و عمل مستقل، معانا ناس من أعمار مختلفة بس نفسنا الدنيا توسع أكتر و يجلنا ناس أكتر عشان ننتج أكتر و أحنا مش بنعمل انترفيو و ممكن تشتغل فترة و تسيب و ترجع تاني مش مقيدين الدنيا.
