fbpx
TechShop، سلسلة من أكبر الMakerspaces في أمريكا، بيعلن إفلاسه و بيقفل فروعه العشرة..
نوفمبر 15, 2017
اصنع بنفسك منجنيق خشب
نوفمبر 17, 2017

هنا بلاسي، بتعمَل ما تُحِب، وبتحب ما تعمَل برضه

معظم الناس اللي عندها شغف تجاه مجال معيّن بتحاول تشتغل في المجال اللي بتحبه ده، أو بتشتغل في أي حاجة حتى لو ما بتحبهاش على بال ما تبني نفسها وتقدر برضه تشتغل في المجال اللي بتحبه.

هنا بلاسي (٢٤ سنة) عندها فكر مختلف خلانا نهتم نعرف قصتها. فهي مش بس شغالة كproduct designer في شركة توشيبا العربي، لكن هي كمان مؤسسة Designed، اللي من خلاله بتمارس هوايتها وشغفها والفن الخاص بيها على شكل هدايا وأدوات وزينة بتعملها بنفسها من الخشب وبلاستيك الacrylic.

وبعد ما قعدنا معاها واتعرفنا عليها، سألنا هنا إزاي بتحاول توازن ما بين المجالين وتنجح فيهم الإتنين.

هنا، إحكيلنا قصة Designed بدأت منين؟

أنا كنت بستخدم ال3D printer في فاب لاب وبعدين شفت الlaser cutter فعجبني اللي بتعمله. بعدها قررت إني أعمل بيه هدايا بأشكال مختلفة. واللي ساعدني جداً هو إني عندي خلفية بما إني متخرجة من فنون تطبيقية وبشتغل في مجال الرسم والجرافيك.

في الأول كنت بهدي اللي بعمله لصحابي وعيلتي، لحد ما الموضوع انتشر وكذا حد اقترح إني أفتح الBusiness الخاص بيا.

إزاي قدرتي توفقي ما بين شغلك كproduct designer وما بين اللي بتعمليه في Designed؟

أنا عندي شغف كبير لشغلي كproduct designer، هو ده اللي درسته واللي أنا عايزة أكمل فيه. أما بقى Designed فده اللي بطلع فيه الجزء المبدع اللي جوايا، والفن بتاعي.

Designed كده بيكبر، بس بالمعقول. أنا لسه بشتغل في نطاق صغير، وأنا مبسوطة بكده عشان ده one-man show: كل حاجة أنا بعملها بنفسي، فلو الموضوع كبر عن كده مش هعرف أعمل توازن ما بين شغلي وحياتي الخاصة. لما بيجيلي order أنا مش عايزاه بقول لأ، عشان مش عايزة أبقى تحت ضغط إن الحاجة اللي بحبها تتحول من فن بستمتع بيه، لمهمة لازم أعملها كل يوم عشان أجيب فلوس وبس.

إيه هي نقطة التحول في حياتك؟

نقطة التحول الحقيقية هي لما اتعرفت على فاب لاب. ساعات كتير كان بيبقى بيتي الأولاني أصلاً. أنا شخص curious وبيحب أتعلم جداً، فلقيت فيه ناس كتير بتعلمني وما بتبخلش عليّ بمعلومة لما بسألها على أي حاجة.

سمعنا إن عندك قصة لطيفة لما اتعرفتي على فاب لاب، إحكيهالنا كده

كنت فاكرة فاب لاب ده كوافير!

أنا كنت بسمع اسم فاب لاب كل شوية فدورت عليه على النت وشفت حاجات مبهرة كتير برّه مصر. والصدفة إني كنت بعدّي على مقر فاب لاب مصر القديم لما كان في جراج في المهندسين، بس كنت فاكراه كوافير مش فاهم اسم اليافطة اللي حاططها.

لحد ما مرة كنت محتاجة أستخدم ال3D printer واتفاجئت إن هو ده المكان. بعد ما بقيت أجي كتير، بقى زي بيتي، بس طبعاً المكان الجديد في المعادي أكبر وأحسن من ناحية التجهيزات.

إزاي قدرتي تحولي هواية لمشروع ناجح كده؟

هي الفكرة إنك تعمل حاجة مختلفة عن اللي في السوق. ممكن تقلد فكرة موجودة أصلاً وتنجح، لكن عشان تتميز عن الباقي، لازم تغير نمط اللي موجود وتستغل تريند الحاجات المطرقعة زي مسلسل Game of Thrones أو الشخصيات الجديدة.

أول حاجة عملتها كانت الcustomized USB، وقتها ماحدش كان بيعملها خالص وبأشكال متنوعة، ودي الطلب كان كبير عليها.

بعدين دخلت في سلاسل المفاتيح، وقعدت أوسع من الشغل اللي بعمله شوية شوية عشان أحافظ على الquality والخامة الكويسة. فدخلت أفكار جديدة ومعقدة أكتر، زي الlight set والعلب المنقوشة وزينة الأفراح.

أجدد حاجة أنا بشتغل عليها دلوقتي هي لوح شطرنج، لسه بظبط التصميم بتاعه.

إيه أكتر حاجة عملتيها وبتحبيها؟

الفانوس اللي عملته لرمضان اللي فات هو الأقرب لقلبي.

أنا أصلاً كنت متوترة عشان ماكانش على بالي تصميم مختلف عن الأشكال الكتير اللي في السوق دلوقتي، فكنت قررت إني مش هنزل بحاجة في رمضان واتضايقت. بعدين فجأة وأنا في الشغل جالي الinspiration، أخد الفانوس كفكرة وتصميم وتنفيذ ٥ ساعات بس!!! عادة ممكن الفكرة تاخد تفكير أسبوع كامل عشان يتحددلها ملامح، فده كان معجزة. والحمدلله نجح.

شايفة إيه اللي بيميز Designed عن أي حاجة تانية؟

أنا شخص perfectionist جداً، لدرجة إن ممكن تيجي عليّ بالخسارة وأتعب وصوابعي تبوظ بس عشان الحاجة تطلع بأحسن شكل.

زائد إني بهتم جداً بالتفاصيل وإن اللي بعمله يبقى سهل الاستخدام: فمثلاً بتأكد إن حاجات الأطفال ماتعورش ودرجة حرارة الlight sets ماتزيدش أوي عشان ما تلسعهمش.. وبرضه لو بعمل علب عليها نقش بتأكد إن الغطا بتاعها مابيعملش صوت التزييقة عشان مايضايقش اللي بيستخدمه.

بتحبي إيه في شغلك؟

بحب لما يجيلي ناس مش عارفة هي عايزة إيه فبتقولي فكريلي انتِ. بقعد أسألها أسئلة عشان أطلع بحاجة مناسبة ليهم. وده بيبقى تحدي ممتع بالنسبة لي.

الmaker movement في مصر، هتوصل لحاجة؟

أيوه طبعاً. دلوقتي مابقاش لازم أبدأ أشرح من الأول إن فيه أشخاص اسمهم makers. لأ بقت الmakerspaces منتشرة، والناس بقت واعية أكتر وعارفة إن الموضوع مش مقتصر على مشاريع الكهربا والتكونولوجيا بس، لكن في أي مجال ممكن تتخيله. حتى أهلي في البيت بقوا عارفين إن فيه ناس بتعمل حاجات جديدة.

فيه حاجات كتير حليتها في بيتي بال3D printer والlaser cutter، زي المروحة والتكييف وحتى عربيتي.

تقولي إيه لحد عايز يبقى maker؟

أولاً، الcomfort zone دي لازم ينساها. ثانياً، ما ينفعش تستنى المعلومة تجيلك بالمعلقة. شغل “أنا محرج أو عندي حساسيات من الشخص ده” ما بيأكل عيش.

لازم تعافر أوي أوي لو عايز توصل لحاجة فعلاً!

طب لو حد عايز يعمل شغل زي شغلك، توجهيه إزاي؟

لازم يعرف إزاي يجيب أفكار، ويبقى عنده الحس الفني عشان هو ده اللي هيميزه.

أما التنفيذ، فموضوع إنك تتعلم على المكن ده سهل جداً وهياخد كام يوم بس. ولازم برضه يتعلم على برامج زي Adobe Illustrator، وحاجات ال3D زي Rhino اللي أنا بستخدمه في شغلي عشان أتخيل الحاجة هيبقى شكلها إيه لما تركب على بعض. و ده بيقلل التجارب والأخطاء اللي بتتعمل على المكن، عشان ده بفلوس ومجهود كبير!

X