fbpx

Creative Coding Cairo في أرض المحروسة

RPi for Normies|وصفة رقم واحد
مارس 12, 2019
أضف وصة
أبريل 7, 2019

Creative Coding Cairo في أرض المحروسة

“حيطة فاضية؟ .. لا دي جواها رسمة.”

هو دا منطقه دايماً في الحياة.. و هي دي زاويته اللي بيشوف بيها أي حاجة قدامه، و إن مافيش حاجة ليها أستخدام أو شكل واحد .. لكن أكيد فيه حاجات كتير وراها هو لسة معرفهاش و لسة ماشفهاش.

صاحبنا النهاردة كان دايماً عنده فضول إنه يعرف و يجرب و يدرس حاجات جديدة حتى لو ملهاش أي علاقة باللي بيعمله، و كان عنده فضول أكتر يعرف ليه هو بيعمل كدة! بس الصراحة مش أكتر من فضولنا إننا نعرف قصة “محمد حسام” .. اللي نتيجة فضوله كانت أول community لل creative coding في مصر و هو  Creative Coding Cairo.

النهاردة مش احنا إللي هنحكي قصته، لإنه أحسن واحد يحكيها و يقولنا وصل إزاي لحاجة أصلاً أسمها creative coding!


مش فاهم ليه؟!

الفن بالنسبة لي مكانش اللوحة اللي برسمها.. لكن الحاجات اللي بشوفها في حياتي اليومية، كنت بحب دايماً أخرج عن المألوف.. بحب العلوم و الرياضة و عايز أدرس programming و تكنولوجيا و إتصالات..و مش فاهم ليه!

أخدت كورس في الشبكات من كلية هندسة، و كان فيه مسابقة في قسم ميكانيكا بيصمموا فيها عربية Formula. كنت مهتم جداً بالموتور وجبت كتاب “كيف تصمم عربية من الصفر” و عملتلهم التصميم.. الحقيقة كان عندي شغف للموضوع حتى لو مش دراستي. احتكيت وقتها بفنانين و دكاترة كتير و كنت بحضر events برة إطار الدراسة التقليدية في فترة الصيف، وكان لسة عندي تساؤل ليه بعمل دة؟

الاحتكاك ساعدني أعرف دكاترة عندهم رؤية أوسع للموضوع و سافروا برة و وصلوا لفكرة إن الفن مش مقيد بلوحة أو بمساحة زي ما معروف في مصر. كنت بحضر معاهم الورش التجريبية اللي بيخش فيها الميديا بشكل بسيط، كانوا بيعرضوا أفكار كتير في المجال دة لكن كمجرد أفكار مش بتتمارس في الورش.


الفضول

الحاجات اللي كانت بتطرح دي خلقت جوايا فضول إني أعرف عنها أكتر، و خلتني أقرأ أول كتاب في مجال ال software و كان أسمه processing، كان هدفه يبسط لغة البرمجة عشان الفنانين. اهتميت أقرا أكتر في الأفكار، و من هنا بدأ اللينك يربط و بدأ يبقى فيه لينك و code و ممكن نطلع منه form، و اللي عامله فنان و designer عادي و عاملينه عشان الفن، و دي كانت البدايات.

بعدها بقى عندي شغف أدور على اللينك في أماكن مختلفة، و دا اللي فتحلي بعد كدة مجال كبير اسمه Media Art.. بس النت وقتها مكانش مفتوح بشكل واسع، بل كان محدود و كله مراجع أجنبية و مش كتير كمان فـ بالتالي خدت وقت أكتر.


رحلة غير مقصودة .. "أنا مش غريب"

الخطوة الكبيرة جت لما أختي كانت  عايزة تحضر مؤتمر عن الanimation في سنغافورة.. و كانوا فاتحين الvolunteering .. فـ دورت كدة في الأقسام المتاح فيها التطوع، لقيت قسم لل Media art و فيه  merging technologies، حسيت إني لقيت اللي بدور عليه بشكل فعلي. سافرت و احتكيت بالناس، و بدأت أحس إن اللي أنا فيه مش غريب لكن يمكن البيئة في مصر هي اللي مكانش فيها الكلام دا


التحول.. العطش

بدأت أدرس المجال، كان في البداية self learning بشكل أساسي.. و بدأت أدور على جامعات و كتب و كورسات أون لاين، و أول كورس أخدته كان في ال interaction design من جامعة ستانفورد. كان كورس مُكثف بيركز على فكرة إن الaudience جزء من التصميم نفسه و بيتفاعلوا معاه.. بعدها أخدت كورس متخصص في الMedia Art تبع جامعة جولد سميث في لندن، الكورس دا بدأ يتعمق بيا أكتر في المجال، كان بيعلم إزاي الsoftware تعمل بيه Art. اتعلمت من خلاله إني أعمل graphics عادية بالcoding لغاية ما وصلت إني أعمل interactive game.

كمان كنت بحب أحضر festivals و events برة و أتابع عشان أحتك بناس زيي و أشارك الخبرات.

في 2012 كنت بروح فاب لاب مصر كـMakerspace و بعدها في 2014 لقوا إني بعمل حاجة ليها علاقة بيهم فـعرضوا إني أدي كورسات هناك في المجال ده.. و قررت ساعتها أبدأ workshops و بقيت من ال technical team.


بدافع الصدمة - في عز حر أغسطس 2015

بس ساعتها لقيت مفيش اهتمام  كبير من الناس بالموضوع و كان سؤال الديزاينر ليه أتعلم برمجة؟ و سؤال المبرمج.. ليه أعمل بيه art؟

لاقيت الimpact مش واضح رغم إنهم برة منتشرين جداً.. فا قررت أعمل creative coding cairo في أغسطس 2015.

الفكرة جات لي لما شفتهم برة في مدن زي برلين، أمستردام، لندن و أماكن تانية بيعملو meetups عن ال art and technology و ال CreativeCoding و ازاي الفنانين و المصممين و المعماريين بيستخدموا ال Coding عشان يعملوا بيه نماذج أوليه للمشاريع بتاعتهم ( prototypes )، و بيستخدموه عشان يعملوا المشاريع النهائية و أفكارهم الإبداعية .. كنت عايز أعمل حاجة زي كدة تبقى educational و awareness  نساعد بيها الناس تبدأ في المجال و يعرضوا المشاريع بتاعتهم.


يفرق إيه الcoding عن الcreative coding؟

الـcreative coding مش مجرد استخدام functional للكود، على قد ما هو بيعبر عن أفكار معينة، فكرة الكود هنا أتحولت من مجرد order، لحاجة أقدر أعبر بيها عن concept و awareness و motion، بمعنى آخر هو تبسيط للغات البرمجة العادية و يعتبر extension ليها.

الميزة.. “By artist for artist”

عمر ما المهندس و المبرمج هيفهم اللي الفنان عايز يعبر عنه في المشروع قد الفنان نفسه … الCreativeCoding هي لغات برمجة معموله من الفنانين و للفنانين عشان يقدروا يعبروا بيها عن مشاريعهم و أفكارهم الفنية و البصرية بنفسهم بشكل أساسي دون الاعتماد على المبرمجين و المهندسين… و هي وسيلة للتعبير بشكل بصري عن أفكارهم … و أكيد فيه فرق كبير بينها و بين برامج البرمجة العادية إلا إن فيه أكيد حاجات مشتركة، ولكن البرمجة بشكل عام معمولة عشان نعمل بيها وظيفة معينة أو function زي إننا نتحكم في مكنة في مصنع أو روبوت .

و الcreative coding ميزته إنه open source، بمعنى إن أي حد ممكن ياخد الhardware أو الـcore نفسه و يطور و يضيف عليه، و هي دي فايدة الopen-source communities، مثلاً ممكن حد يعمل الـlibrary و يرفعها و أي حد يستخدمها بعد كده.

“و عشان كدة الcreative coding  قايم على الكوميونتي مش على شخص أو على شركة… زي  open framework community”

و بالتالي نقدر نقول إن الcommunity هي اللي بَنِتْ الsoftware .. لإن الـdevelopers ميقدروش يعملوا حاجات كبيرة زي الـAR & VR، و معندهومش وقت يعملوا حاجة كدة أو ينفذوا و يطوروا كل الأفكار اللي بتطلع، لكن الcommunity هي اللي بتبني و بترفع و الdevelopers بيعملوا test و approve بعد كدة.

وفي الآخر هي برمجة بتجمع ما بين التكنولولجي و العلوم و الفن.

و طبعاً كان فيه gap رهيبة و أهم gap هو الثقافة، يعني برة اللي بيشتغل في الموضوع ده بيبقى فاهم إنه بيعمل الdeveloping و الdesign و كل حاجة، لكن هنا الناس محددة نفسها في اللي بتعمله. حتت الرفض و عدم القبول و عدم الدمج ما بين المجالات، و فكرة إنه فنان بس ممكن عادي يعمل برمجة و كدة مش موجودة.

مافيش جديد و قديم!​

الCreative Coding هو مجال من مجالات الMedia Art، و هو مجرد طريقة مختلفة للفنانين إنهم يعبروا عن فنهم.. فبدل ما الmedium بتاع الفانين التقليديين هو الcanvas، الcreative coders بيعتبروا الcode هو الmedium إللي بيعبروا بيه عن فنهم.


التحدي.. عايز أوريها للناس!

بعد فترة بقى عندي knowledge كبيرة عايز أوريها للناس و عايز أخلي دا شغلي الـfull time، لكن لقيتها حاجة صعبة إني أعمل مشاريع و أدرس و أتابع الupdates، و مبقتش قادر أدي كل حاجة حقها.. بس مع الوقت بدأ يبقى في وعي أكتر عند الناس بالـcreative coding و كنت سعيد إن فيه ناس بتتفاعل.. و فعلاً في خلال سنتين جالي دكاترة و معيدين قرروا إن مناقشة الرسالة بتاعتهم تبقى عن الـCreative Coding و الـMedia art و أخدوا مني resources عن الموضوع

و مؤخراً بدأ يبقى الموضوع مُتعارف عليه و فيه festivals للMedia Art زي CairoTronica الى هو ( مهرجان القاهرة الدولى للفنون الالكترونية و الميديا ) وكنت من فريق المنظمين بتاعه و أتعمل مرتين في مصر


اهبط بحلمك على الأرض

و فعلاً بدأت أعمل projects على الأرض زى Immersion ( انغماس ).  استخدمت فيها تقنية زي video maping و generative design، و اتعرض في الأوبرا و خدت جايزة صالون الشباب،


لأ خلاص أنا هرجع

الموضوع الصراحة كان ماشي بطئ، خاصة إني كنت بقنع نفسي أتعلم و أعمل حاجات بسيطة و سايب برة ناس متطورة جداا و جي، يعني الناس برة بيتنافسوا مع بعض فى قوة projects الخاصة بيهم باستخدام أنواع مختلفة للغة البرمجة أو Softwares مختلفة من بتوع Creative Coding  زي  touch designer  و  unity و  VVVV و MAX MSP ، ويبدوا يعملوا Applications مناسبة ليهم باستخدام ال softwares دى ،و فنانين الميديا و Creative coders  بقالهم 10 سنين شغالين فى المجال ده ، في حين إننا لسة مش عارفين إيه مجال الcreative coding..وإيه البرامج الخاصة به ؟ فـ كانت حاجة مُحبطة. لكن الشغل على الحاجات هنا و الناس اللي كانوا بيشجعوني خلوني أكمل.

الموضوع كان مُحبط كمان على مستوى الindustry، يعني مثلاً برة بيستخدموا الcreative coding في مجال الإعلانات و الevents و بيشتغلوا بيه في ال studios، لكن هنا بعيدين كل البعد عن الكلام دا و لسة شغالين بالmotion graphics التقليدية.

كذا حد كان بيسألني هو الcreative coding معمول لمين أو مين المفروض يشتغل بيه.. عشان كدة مهم نعرف النقطة دي. أنسب ناس يتعلموه أو يشتغلوا بيه، هم الفنانين  و المصصمين لإنه بيساعدهم يعملوا من خلاله theme لمعرض أو لحاجة شخصية، كمان ال باحثيين ، موسقيين، Event planners 

و أكتر ناس بيحتاجوه كمان الـ designers و بالأخص الـproduct designers لإنهم ممكن يعرضوا من خلاله الproduct  بطريقة محتلفة، يبقى مثلاً Interactive products.. و كمان الـArchitect لإن العمارة اتطورت زى competition design من المجلات المتخصصة الى بتستخدم creative coding 


بدل ما اتوه…

و مهم لأي حد بيبدأ إنه ميتعلمش برنامج معين.. دا غلط، لكن يتعلم المجالات و يدرس تاريخ الفورم و الكود مع بعض و يشوف أمثلة و projects يغذي بيها عينه بحيث يقدر يقرر هو عايز يخش في أنهي مجال و يقدر يحدد أفضل software يقدر يشتغل عليه، لإن الـCreative Coding ليها مجالات كتيرة جدا

مثال:

الinteractive art  و ال cyber art ، فيه حاجات كتيرة مشتركة بينهم بس الinteractive   بيجمع بين الهارد وير و السوفت وير و خلطmediums مع بعض عن طريق الـsensors و الgestures .. مثلاً فنان اسمه سونام من الدنمارك، في كايرو ترونيكا كان عامل حيطة تفاعليه (الناس ليها ضل على الحيطة و هي ماشية و الحيطة معروض عليهاprojectors لجرافيجس ماشية .. و كأنهم ،ghosts كان قايم على فكرة الكاميرا و الtracking و إزاي الكاميرا تشوف و تحول الtracking دة لGraphic و تاخد الsilhouette بتاعه و تحوله لanimation.

الكلام دا بيستخدمه brands طبعاً زي مرسيدس و نايك و أديداز في الإعلانات برة كنوع من أنواع ال  interactive media

 

Ghost Scanning #2 from Sune Petersen on Vimeo.

audio visual art، و دا ممكن أعمل من خلاله live show  بالمازيكا و الحاجات تبدأ تلعب حواليه حتى لو أوركسترا.

 

Partituira – Ligeti – {Excerpts} from Abstract Birds on Vimeo.

كمان في مجال تاني زي ال mixed reality، أبقى لابس نضارة و مركب فيها الموبايل و بيطلعلي حاجة من كاميرت الموبايل.. و دي و ليها استخدام فني و أكتر براندات بيستخدموها هم العربيات في اعلاناتهم.

مجال تاني زي الـvideo maping، و هو إن مبنى مثلاً ممكن أعرض عليه حاجة virtual أو ثري دي بإستخدم projector بخصائص و أبعاد الحاجة و هو بيدمج ما بين الواقع و الخيال.

 

كمان  في الـ .data visualization يعني مثلاً كان فيه مشروع المصمم كان عايز يجسدلنا من خلال لوحة 3D digital scuplture حالة الجو في بلد تانية، بس دا مش animation لكن الdata هي اللي كانت بتتغير و الcoding هو اللي بيعمل الحركة في اللوحة على أساس الdata.

كمان فيه الlight art أو الpixel maping و دا بيستخدم في مجال الinteractive art و ممكن نعمل بيه نحت خلفية sting بيتفاعل مع صوت أو data مثلاً.

 

عندنا كمان الinternet art وده فن من فنون الميديا و بيكون الbrowser واحد من الcanvas .

كمان ال VR .كان في فـNode Forum مثلاً فنان إنجليزي كان المشروع بتاعه إنه نزل الغابة في إنجلترا و عملها 3D Scanning، درس مجموعة من الحيوانات و طبيعة حياتها، و خلانا  أثناء العرض نلبس نضارة و بدأ يورينا حياتهم من وجهة نظرهم و غير ألوان البيئة و خلانا نتفاعل كأنهم موجودين حوالينا فعلاً.. فـ بالتالي هو هنا ناقش مفهوم و فكر جديد.

 

ITEOTA TEASER from Marshmallow Laser Feast on Vimeo

كمان ال AR .. و اللي ليها في مصر مفهوم غلط

و هي إنها بتُستخدم بس في مجال الإعلانات مش الفن، و كمان في عدم تقدير لإمكانيات التطبيق سواء على مستوى الصرف أو الجودة.

التصحيح: الAR عبارة عن مشروع كان معروض برة و هو  إنهم  أستخدموا الـAR في   الstory telling  عن طريق تابليت تمشي بيه في ميدان أثري مثلاًـ و الكاميرا هتبين  على التابلت الآثار اللي كانت موجودة بـ3d objects، و دا يُعتبر برده real art معتمد على الreal time


طيب أبتدي إزاي؟

أي حد عايز يبدأ بقى بعد ما عرف كل المجالات بتاعته، فيه resources أون لاين أكتر بكتير دلوقتي زي كتاب Nature of code لـDaniel Shiffman و دا بيستخدم في برنامج الprocessing  واحد من برامج creative coding و يعتبر مدخل لأي شخص سواء developer أو programmer أو artist بيتعلم من خلاله يكتب code بسيط و يشوف نتيجته في نفس الوقت.

  • كمان p5js بلغة  Java scrip و دا سهل تنزله و ليه  tutorials لشرح الكتاب أون لاين
  • كمان موقع open processing  و دا يُعتبر open source community كبير، قايم على فكرة الexperiments للناس اللي بتحب تعمل sketching. و الحلو فيه إن الناس بيرفعوا شغلهم، يعني  ممكن من خلاله تنزل الprojects و تلعب بيها و تطور عليها
  • و فيه موقع تاني إسمه creative application.net و دا يُعتبر أون لاين magazine بتعرض أعمال للفنانين الprofessional و الموقع متقسم بالسنة و بالأقسام
  • فيه كمان كورس programming for visual arts  من جامعة UCLA فى أمريكا و دا قايم على كتاب  code + form
  • و طبعاً مهم إنهم يحضروا الـfestivals و الـconfrences اللي بتتعمل في المجال دة عموما، زي cairotronica ، Ars Electronica و confrences كتير تانية.

“أوعى تنسى تحضر creative coding cairo meet up”!

و هيستفيدوا أكتر لما يجوا يحضروا الmeet up بتاعتنا،  لإن بيبقى فيه تساؤلات في دماغ الناس بنجاوب عليها و بنبدأ نقرب المسافات، و كمان لإن الموضوع تراكم خبرات، و إحنا بنعمله آخر أسبوعين في الشهر في فاب لاب مصر كل شهر أو شهرين مثلاً..


Creative Coding and Making

الcreative coding ليها علاقة بالmaking خاصة في المجال الarchitecture parametrics و اللي بيتعمل بنظام معين للcreative coding بشكل systematic و  الstructure دا بيتعمل ثري دي و بعدين بقطعه و بعمله fabrication، بعدها بقدر أبنيه و أبني عليه media.. فـ بحتاج عشان أعمل كدة أكون قعدت مع الArchitect، و ندرس طبيعة التصميم فـ أعرف حركة الwind مثلاً و أعمل simulation و أطبعه على الخشب و أحطه و أبدأ أعمل interactive media.

    • مثال على كدة مثلاً، كان في واحدة من ألمانيا بتعمل spaces و structures معينة قايمة على فكرة الروبوتات عشان يعملوا عمل فني، و هي اللي بتبنيه و بتعمله من الخيوط و تخلي الروبوتات تمشي عليها بعد كدة على الحيطة

MoRFES_01 from ICD on Vimeo

يعني نقدر نبسط العلاقة بإن الcreative coding بينقل الproject من مرحلة الdigital للphysical،  فـ مش بيتقدم على إنه منتج على قد ما هو فن الinteractives.


عايز أروح بـCreative Coding Cairo على فين؟

نفسى أعمل فيما بعد media lab  في فاب لاب مصر عشان أدعم الناس اللي عايزين يتعلموا الموضوع و الprojects بتاعتهم، كمان عايز أدرس الموضوع في الجامعات في مصر خاصة في جامعات و الكليات اللي ليها علاقة بالفنون و الdesign لإنها مهمة.

حسام أخيراً خلص قصته.. بس رحلته في الcreative coding  أكيد لسة مخلصتش، و أكيد برده هيبقى عندنا فضول قدام نسمع منه حكاياته الجديدة

طيب حسام ممكن يكون علمنا إيه غير الcreative coding ؟ .. علمنا إنه أي فرصة تبع الحاجة اللي انت بتحبها و نفسك تجربها جربها، متقولش لا ده مش هدفي و أنا مش محدد و هضيع وقت.. لو تضيع الوقت بالشكل ده و هيعمل النتايج دي! .. لأ ضيع و جرب و العب و بوظ و ميهمكش لإنك أكيد هتطلع بحاجة مختلفة عن الشخص اللي خاف يبوظ و ينخرب و يزيح الستارة يشوف الشباك اللي وراها .. يمكن كان بيطل على منظر عمره ما كان هينساه ألهمه للوحة مكانش حد غيره يقدر يرسمها … أو حتى علمه الرسم عشان كان نفسه يرسمه و ينقله بنفس الإحساس اللي شافه بيه أول مرة …

X